Ein einleitung diß buchleins yn die kunst Cosmographia.

gOtelob in ewigkeith. der do mildiklich gibt.  sterkt und merth die
vornemen todtlicher menschenn.  vnd in zu erkenen gibt sein schepfung.
auff das si merken vnd brüfen mogen das alle ding auß ime urspringlich
anfang vnd end haben.  von im auch endtlich nach seiner vorbesehung
geregirt vnd geordent werden.  Auch als vnß aristotiles beschreibet.
das dy vndersten von den obersten ir wesen haben alls durch ein
eynfluß der hymel vnd planeten.  das dann geschicht zam durch ein
hantgezew gottis aller ding regirer.  So aber vnd menschliche vornunft
allzeit schneller vnnd begreiflicher ist zu vornemen vnd behalten dise
ding di sich vor angesicht unser ougen reglich bewegen vnd leiplich
erzeigen.  dann dise ding dy do ferer vonn vnserz gesicht oben in
ewiger beweglikeit gesaczt sein vnbegreiflich nach vnser leiplikeit
wol aber nach vnserm vornemen.  von deßwegen vnd wie dann mer geneigtt
sein von natur irkante dingk von weisen mennern zu wissen vnd zu
irforschen.  die dobei vns vnder dem firmament sein vnd ir wesen
haben.  dann dise ding di vber vns wirken di do etlicher mosse vnser
vornemen vbertreten  //

Sulch vnd erste ding zu yrforschen vnd begreiffen.  lernet vnß der
yrfarne maister Ptholomeus claudius von alexandria yn dem buch do er
beschreibt vnd zeigt die gestalt diser inwonenden werlt mit schonen
figuren mit rechter mosse der kunst geometrey wo yezlichs teyl der
wer[l]t vnd dem hymel sey gelegen.  welcher egemelter ptolomeus nicht
mit cleinem sunder mit grossem vleyß vnd mu dy recht vßteylung diser
werlt mit aller gerechtigkeyt deß zirkels hat erfunden.  welche kunst
ym latein genant wirt Cosmographia.  Zu teutsch wirt also bedeut Ein
kunst dye do vns bezeichent vnd zuuersten gibt dy gelegenheyt vnser
bekanten werlt. das ist. vnsers obirn emispery. wo iders teil der
selben welt gelegen sey. vmbflossen mit mere. ouch was gutz
reichtumer. früchte. vnd wasser. siten der menschen. yn einem
yczlichen teyl sein mag.  Dorczu vnd welche namhafftigisten wasser
durchfliessen vnd durchschneyden das ertrich.  streichend yn yrem
alueo. das ist. yn yren stramen. ouch von wanne si vrspringklich komen
seyn.  vnd widerumb yn das mer sich vermischen vnd vorbergen


Uon der gemeinen figur ptolomei gegen dises büchleins Figur. //

[N]Ach ynhalt vnd meinung der gemeinen figur ptolomei claudi. wirt
außgezogen vnd genomen ein sunderliche gemeine figur dysser bekantenn
werlt klein vnd gefug dysem buchlein dienend mit aller notturfft der
grad. linien. paralelln. climaten vnd meridian becleidet.  Uon welcher
figur ptolomei zumercken ist das dises buchleins figur ein ander
gestalt hat.  wann dise gantz rund ist nach zirkels moß. mit yren
volkomen graden vßgeteilt.  nach welchen graden alle maß gert diser
kunst.  vnd ouch gancz vber eine trift mit der meinung des
offtgedachten ptolome wywol er yn seyner figur seczt alle dise land
die do menschlicher erfarung kunth sein vnnd den zirkel der erden
nicht volkomen vorendet sunder beschleust gegen mittag mit dem
sibenden paralell vnd gegen mitternacht mit dem 6ten paralell.  das do
geschehen ist von deßwegen. so sich die bekanten teil diser weltmer
cziehen yn dy lenge dan yn die breyt.  alls von dem abend yn morgen
vnd widerumb.  so hat er dise figur vberlengt. vff das er gerewmer dy
drey teil der werlt doreyn hat mugen pringen.  vnd waß ym abgieng an
der breit das er es brecht in die leng.  vnd bedeutet dormit die leng
diser keuliten welt.  so ist nun offenbar das di kaul des ertrichs
rund sein mus wi wol das erttrih vberal mit menschen nit besaczt.
hierumb dise figur dises buchleins nach vnuerzucktes zirkels mos //
aygentlich gantz keulicht gemacht ist ouch ytzlich land vnttir seinem
sunderlichen meridian vnnd paralell gesaczt eben wie ptolomeus lernet

Das aber dis teil gegen mittag außwendig dem. zirkel des ste[i]nboks
mit lande nicht belegt ist das macht vmbekantheit der selben erden von
nyemands erforst.  ydoch ist es ein teil der rondhait diser kaul das
mag man also volfuren.  So ptolomeus die geschiklikeit seiner figur
rundt gemacht hat yn orient vnd in occident noch czirkels maß.  volget
hierauß das si diß gestalt haben muß ym mittag vnd mitternacht.  des
zu einer besern bedeutung ist dise figur gancz keulicht geordent der
vrsach halben so alle spern der oberen rechte rondheit deß zirkels
halten so geleich bildet sich auch ine di kaul des ertrichs


Uon inhalt dises buchleins figur.

fUrth zu reden von inhalt diser gegenwertigen figur ist zu wissen das
dise zirkels linien di do geen nach der leng von orient in occident
werden genant paralelli yn der gemein vnd selden dy stelle der recht
gesaczten paralelln beruren.  auch werden dise vorgenanten vnd
bezeichenten zirkels linien genant climata yn diser figur mit
vnderschaid.  vnd werden allzeyt // von dem Equinoxial das ist von dem
geleicher tages vnd nacht nach den graden gerechent als hiernach
folgen wirt yn dem capitel von den climata vnd paralelln.  Es werden
auch 5 grad genomen yn der gemein zwischen den gezogen lynien von
orient in occident der vrsach halb.  das man bald in gemeinheit finden
mag wo iczlichs land gelegen ist vnd wie vil grad von dem
equinoxial.  durh welche grad dan vßzurechen ist wyweit ein
land. stät oder gegenheit aus der zonne weg gelegen ist das ist vß
dem zodiaco zu deutsch genant. Tiersteig.  Dise zirkels linien die do
gen nach der breit das ist vom mittag in mitternacht baide polos
treffend.  das sind gesprochen meridians linien durchschneiden alle
paralellen vnd climata in crüczweiß Poli aber werden genant die
axen des hymels vnd der sind czwen articus vnd antarticus.  der do
genant wirt articus das heist vff teutsch der wagen am himel den sehen
alle die. dy do ligen vßwendig dem czirkel deß kreps gegen mitternacht
dorinne die zonne iren stand hat vnd widerker.  Von dann dieser czirkel
wirt geheissen Tropicus vff kriechisch czw deutsch ein widerker 

Der do aber genant wirt Antarticus den kon wir noch alle die die do
sein gegen mitternacht gelegenn nicht gesehenn.  do von dann Uirgilius
// schreibt berurnd die eygenschafft diser czweier poli vnd spricht

Hic vertex nobis semper sublimisat illum sub.
Pedibus stix alta vident manesque profundi

Domit gibt er zuuerston wie das alweg der polus articus mit seinem
hoen irheben sich vns yn Europa vnd den gegen mittirnacht tut
irczeigen.

Der ander aber genant antarticus wirt vnderligen disem artico gegen
mittag den do sehen di tiefsten uff dem selben teil gegen vns ligend


Uon den drey Zirkeln. der Sunnen

[A]uch ist zuwissen das dise dry zirkel rot verzeichent yn diser
figur.  sein genantt zirkel der sunnen von deßwegen so sy kompt mit
irem louff in diser czirckell eyn.  so macht si vorwandlung der tag.
vßgenomen ym Equinoxial so macht si geleich tag vnd nacht in der
ganczen werlt.  vnd diser ist der mitelst zirkel. vnd wirt genant ein
gleicher.  von deßwegen das er yn aller werlt gleycht. tag vnd nachtt.
vnd alle menschen dy vnd disem zirkel [d]er sonnen wonen die sehen
beyde polos an dem hymel das do sunst yn der ganczen werlt nicht
gescheen kan.  auch teilet diser zirkel das erttrich gleich yn // zwey
teil das ain leit gegen mittag. das ander gegen mitternacht.  von
orient in occident

Disen zirkel equinoxial durchschneidet ein ander zirkel winkelrecht
gend von einem polo yn den andern vnd ouch von orient in occident.
der selb zirkel wirt anders genant Orison vniuersalis das ist ein
gemeiner zirkel dorynn die sonn auff vnd nider geet.  diser halben
kaul des oebersten emispery das ist. vnser bekanten welt.  diese czwen
zirkel teilen di kaul des ertrichs yn vierteil welcher teil
eins. recht mit menschen besaczt ist dauon dy Cosmographia schreibt
Der ander zirkel gegen mitternacht wirt genant Tropicus cancri.  dyser
zirkel ist gesaczt von dem Equinoxial nach der breite 23 grad so die
sunn yn disen zirkel kompt kan si nicht weiter gen vß dem zodiaco das
ist vß dem tiersteig vnd muß widerkeren zuruk gegen dem equinoxial vnd
so die sonne noch pei disem zirkel vmschweifft macht si vns yn europa
die lengsten tag ydoch einem land mer dann dem andern Dise menschen
aber die do ligenn zwischen disen zweien zirkeln die haben ym Jor.
zwir cenit das ist das yn dy zunn gleich vber iren heuptern stet vnd
kein schatten von yn werffen.  alls die menschen sein yn der gegenheit
meroe ym flisse nylo gelegen das es aber zwier geschicht ist di sach
so die sonne sich von dem equinoxial ne[i]cht gegen den tropico cancri
das ist von gregori biß uf viti // so trifft des czenit ein mal.  vnd
so sich die zonne wider gibt zu dem equinoxial So trifft es aber ein
mal das ist von viti bis vff lamperti alls gelegen ist die insul meroe
Ym andern paralell vom equinoxial vnd alle stete die in disem paralell
ligen die haben czwen cenit.  die menschen aber di do gleich ligen
vnder disem zirkel deß krepsen die haben nur ein mal zenit im iar ein
stund eins tags so die sonne stand hat also ist gelegen di stat Siene
im 6 paralell dauon Lucanus schreibt

Umbras nusquam flectente siene. das ist. das in der stat siene der
menschen schatten nimer gelenget wirt. vorstanden in einer mittags
stunden so die zonne im kreps ist.

Der dritte zirckell wirt genant Tropicus capricorni.  das ist ein
widerkerer des steinboks so dy zonne in disem zirkel schweift.  macht
si vnns in europa kurcze tag.  dem teil aber gegen mittage.  lenger dy
tag wie wol nicht vil besaczter lannd do sein von wegen grosser hicze
iedoch verpringet die sunne eben irenn lauff in disem Steinbok alls im
kreps.  diser zirkel leit auch eben als vil von dem equinoxial als der
ander im 23 grad vnd so di sonne sich nehet czu disem zirkel macht si
vns die wir gelegenn sein in dem sübendenn clima die tage kurczer
also das der tag // nur viii stund lang wirt.  vnd hebt an zu geen von
equinoxial am tag lamperti vnd get bis auff Lucie so trit si in den
zirkel genant capricorni. dorinn sy muß wider keren.


Hie nach geschriben sagt es von dem zodiaco.

dJse vorgenante drei zirkel beruren vnd treffenn den zodiacum. an vier
endenn vnd widerum.  auch wirt er in dise drey zirkel gelegt vber
ort. also das er si aller beruret auff teutsch wirt er gesprochen der
tiersteig von deßwegen das die selben zeichenn die er tregtt tiren
gegleicht werden pey vns hyniden wi wol das si an ym selbst sterne
sein so haben dy alttenn astronomi dy selben sterne also figurirt vnd
mit linien zuhuff gezogen hy vnden.  vnd worzu sich dy selb figur
geschickt oder gegleichet hat. haben si doruon einen namen genomen vnd
auch von der eygenschafftt desselben gestyrnis alles eczliche wellen
der selbenn zeichen ym zodiaco sein 12 von welchen der zodiacus wirt
genant eyn zeychen trager.  Zu latein Signifer.  dise 12 zeichenn seyn
genant vnd gemerkt wye hyenach folget.  

Der stier Der ochs Dy zwiling Der crebs Der lev Die iunckfrav Die
wage. Der scorpio Der schücz Der steinbok Der wasserman Die vische.
so nun die sunn durch dise // 12 zeichen lauffet vnd kumpt in das
zeichen des stiers vnd der wag. welche zwey zeychen gegen eynander
sten so macht si vns gleich tag vnd nacht durch die gancz werlt.  wann
si aber kompt yne das zeichen des creps do pleibt si vnd kert wider
umb von mitternacht yn mittag do macht si den menschen gegen
mitternacht ligend grossen tag von danne wirt genant dises zirkels des
kreps oberster grad der sunnen stand des sumers.  wann si aber kompt
in das zeychen des steinbocks maht si vns kleine tag vnd kan ouch
nicht forder vnd get wider gegen mitternacht von deßwegen wirtt genant
dises zirkels hohe. zu latein Solsticium hyemale das ist der sunnen
stand deß winters


Jtem welche land zu geeygent werden yn sunderheit disen 12 zeichenn.
 
[A]Uff ettliche land vnd stett habenn diese 12 zeichen yn sunderheit
zu ueigung . Nemlich das zeichen wider.  Alls haly halbenragell
schreibt sicht an das ertrich Babilonie. armenien moßquitten klein
polen vnd mitt dem planeten Marte die stat Crokav Und das zeichen ist
von natur. alls die meister der edlen kunst Astrologie sagen.  warm
truken vnd feurig vnd wirt zugeeignet dem houpt des menschen gut
oderlossen. //

Thaurus.  das zeichen des ochsen sicht an das ertrich nichin megir an
dyzanzen vnd das gepirge daleigk deßgleichen klein polln vnd yn
sunderheit mit dem planeten venus.  Dy stat poßen von natur ist das
zeichen kalt truken vnd irdisch czu geeigent dem hals des menschen.
bos daryn oder lossen.

Gemini.  das zeichen der zwiling sicht an clein armenien. iurgen.
egipten. barchan vnd engelland mit dem planeten mercurio dy stat Neyss
ligend vßwendig dem 7 clima yn dem 15 paralell von dem occident 40
grad vnd 1/2 dis zaichen ist warm feucht vnd lufftig vnd ist zugeg
benden schultern armen vnd henden vnnucz in oderlossen

Cancer.  das zeichen des kreps helt vnder ym das ertrich Barbarischken
yn affrica. franckrich vnd teilhafftig yn egipto vnd aller ynsuln yn
orient vnd das land Prevssen mit dem planeten Luna vff teutsch mon
genant sicht an di stat danczgk dis zeichen ist von natur kalt feucht
vnd wesserig vnd wirt zu gegeben der brust der lungen vnd dem magen
wandelbar yn oderlossung

Lew.  Das zeychen dess lawen hatt vnder ym Turkey. Lombardey das
erttrich gogk vnd magogk vnd dy ynsul Sicilia vnd das land persie vnd
Behemen Mitt dem planeten Sol // die stat Prag.  Diß zeichen ist warm
vnd trucken vnd feurig vnd hat des menschen ruck vnd seiten in gewalt
vnd ist sorglich oderlassen.

Uirgo.  das zeichen der iunkfraven hat vnder im gancz kriechen land
die Jnsul creta oder candia. das ertrich almaseil. vnd Slesie mit dem
planeten mercurio die stat Breßlav Diß zaichen ist von natur kalt
truken vnd irdisch besehen dy ingeweid des menschen. mittel in
oderlassen

Libra.  das zeichen der wag hat vnder ym daß ertrich der Cristen bis
an affricam vnd das ertrich Cuß vnd gros alexandriam.  ouch das etrich
ostereich.  mit dem planeten mercurio.  di stat nürenberg.  diß
zeichen ist von natur warm feucht vnd lufftig des menschen nabel vnd
vndersten leyb bewarend.  nutzlich im oderlossen.

Scorpio das zaichen helt vnder im die erde.  albiges arabiam. vnd
barbariam. romaniam vnd das ertrich Zemonem.  auch groß arabiam Mitt
dem planeten marte.  die stat padwa.  diß zeichen ist von natur kalt
vnd feucht des menschen scham vorwarnde

Sagitarius.  das zeichen des schuczen hat vnder im das ertrich
aziud. hispaniam ciliciam.  sardiniam .  mit dem planeten ioui das
erdtrich von hungern dartzu wien. ofen. merhernn.  olmuntz.  Das
zaichenn ist von natur warm trucken vnnd feurig den beinen vber dem
knie zugeschriben. //

Capricornus.  das zaichen des steinbocks hat vnder im das ertrich
azim. cheif albabar. ioazatt yndian. constantinopolim vnd des gantzen
occidents port.  mit dem land lausitz vnd dy stat loka mit dem
planeten saturno.  diß zaichen ist von natur kalt trucken vnd irdisch
vnd helt die knie das menschen vnnutz im oderlossen.

Aquarius.  des zaichen das wassermans hatt das ertrich azenet alkuffam
vnd alkot in egipten vnd das gelopte land dortzu vnd Schwabenn. mit
dem planeten saturno.  di stat rotbus.  dis zeichen ist von natur warm
feucht vnd lufftig.  die waden des menschen besehend mittel im
oderlassen.

Pisces.  das zaichen der fisch helt die gegennheit gegen mitternacht
vnd die stat Rom mit dem lande portigal.  welchem land zw geeignet
wirt.  Jupiter der planet mit der stat großglogav Diß zaichen ist kalt
feucht vnd wesserig besehen die füß des menschen mitel im oderlassen

Dise 12 zeichen werden geteilt in zway teil di ersten 6 werden genant
Borealia als vil gesprochen von dem wind Boreas der do blest vonn
mitternacht vnd sind dise.  Stier Ochs Zwiling Kreps Lev Junckfrav Die
andern 6 werden gesprochen australia von dem wind auster blosent in
mit tag vnd sind dise. wag. scorpio. schucz. steibok wasserman. fysch
welcher 12 zeichen sind alleczeytt // 6 vnder dem erdtrich vnder vns
vnd 6 vber vnß


Uon den linien paralellenn

wEiter zu reden von bedeutunge der paralellen ist zu mercken das
ptolomeus spricht.  wie das paralellus nichtis anders sey dann ein
vnderschaid zweier linien so si gezogen werden on vorhindernuß gleich
von einander stehende so durchschneiden si sich nymer yn ewigkeit.
Aber also. paralellus ist ein spacium odder velde zwischen zweien
linien.  welhs spacium am anheben vnd am end zwischen disen linien yn
einer gleichen weite ist gezogen.  diser paralelln werden gesaczt pey
dyser kaul der werlt nach dem vorgenanten ptolomeo yne zal 21.

1 Der erst paralel abstet von dem Equinoxial 4 grad tag habend 12
stund lang 1/4

2 Der ander stet von dem equinoxial 8 grad.  vnd hat tags lang 12
stund 1/2

3 Der drit stett vom Equinoxial 12 grad vnd hat tags leng 12 stund 1/2
1/4

4 Der vierde stet vom equinoxial 16 grad dy grost leng deß tags ist 15
stund.  vnd trifft vber eyn mit dem ersten clima.

5 Der funfft paralell stat vom Equinoxial 20 grad vnd hat dy groste
leng dest tags 13 stund 1/4

6 Der sechst paralell hat 23 grad. vom // Equinoxial.  dy grost leng
des tags ist in dysem paralell 13 stund 1/2 .

7 Der 7 paralel stett vom equinoxial 27 grad vnd hat leng dess tags 13
stund 1/2 1/4 .

8 Der achtet paralell hatt 30 grad vom equinoxial gerechent yn dye
braite die grost leng deß tags ist 14 stunden.  vnd vbergett das drite
clima durch alexandriam

9 Der newnd paralell stett vom equinoxial 33 grad vnd hat tag vffs
lengst 14 st. 1/4

10 Der zehend paralell stet vom gleycher der nacht das ist vom
equinoxial 36 grad.  die grost leng deß tags ist 14 stund 1/2

11 Der eylfft stet vom equinoxial 38 grad dy grost leng des tags yn
disem paralell ist 14 stund 1/2 1/4

12 Der zwelfft paralell stet vom equinoxial 40 grad.  vnd hat langen
tag auff 15 Stunden.

13 Der 13 stet vom equinoxial 43 grad hatt vffs lengst tag 15 stund
vnd 1/4 vnd trifft constantinopel

14 Der 14 stet vom equinoxial 45 grad. hat vffs lengst tag 15 stund
1/2

15 Der 15 paralell stet 48 grad vom equinoxial vnd hatt 16 stund tag
vnnd geett durch das fliß Boristenes yn Revssen

16 Der 16 paralell stet vom equinoxial 51 grad. vnd hat leng deß tages
16 stund 1/2

17 Der 17 paralell stett vom Equinoxial 54 grad vnd hat tags leng 17
stunden.

18 Der 18 paralell stet vom equinoxial 56 grad vnd hat langen tag vff
17 stunden 1/2

19 Der 19 // paralell hat 58 grad vom equinoxial vnnd 18 stund tag

20 Der 20 paralell stet vom equinoxial 61 grad vnd hat langen tag 18
stund. 1/2

21 Der letste paralell ptholomei stett vom equinoxial 63 grad vnd hat
tag 19 stunden.

Uber dise paralelln hat der münch nachgesaczt 8 paralell dy yn dyser
figur von engheit wegen deß zirkels nicht gesaczt werden


Uon den climaten.

[A]yn clima wirt gesprochen.  alls dan schreibt Johannes desacrobusto.
ein spacium oder breite deß ertrichs auff welcher breite man merklich
spüren mag vorwandlung deß tags nach rechtem gerichten seyger yn ab
oder zunemung der stund. nach deß tages größ.  welcher climata yn der
zal süben sind als hiernach bedeutet wirt vnd werden ouch durch
czyrkels linien bezeichent auff diese kaul.  vnd dyse 7 linien werden
genant forderlich paralellen vnd haben vnderschaid yn den namen.  wann
worumb dise 7 linien werden genantt yn sunderhayt Climata. von
deßwegen daß durch si dy climata geteilt werden vnd zwyschen dise
linien werden gesaczt.  aber ander linien diser spacia oder stellen
der climaten teyllend vnd dise werden genant sunderlich paralelln.
auff das man yn eynem clima sunder // wandlung deß tags mer dan an
ainen ortt so secztt man darein paralelln.  Ein exempel.  Yn dem 5
clima ist der tag lang 15 stund gleich vndt man fint doch mer
verwandlung des tags dan an eyner stell des ertrichs noch gleichwol
seczt man das 6 clima von danne vmb eyn gancze Stund.  wye wol man
spürt vorwandlung deß tags zwischen disen zweyen climaten vmb ein
halbe stund vnd 1/4 noch seczt man an dise end nicht climata sunder
paralelln.  auff das man eygentlich merken mag wo sich der tag yn
dysem clima vorendert Dise climata alle werden gerechent nach den
graden von dem equinoxial.  Zuuorston aber was eyn grad sey ist
zumerken so ein zirkel geteilt wirt yn 360 teyl derselben teil eins
ist ein grad.  ein grad aber geteilt yn 60 teyl der teil eins ist ein
minut.  ein minut hat 60 secunden.  ein secund hat 60 tercien.  ein
tercia hat 60 quarten.  vnd also biß vff ein decima vnd gleicherweyß
als ein minut ist eyn teyl eins grads.  Also ist ein paralell ein teil
eyns climats. dorynne er stet.

Das erst clima dyameroes

[D]Is clima wirt genantt dyameroes von der ynsul meroe.  Die do leitt
yn egypto vmbflossen mit dem edlen flyß nilo komenndt von mittagk
welche ynsul meroe ligt zwischen dem driten vnd vierden paralell //
vnd yn dem 60 meridian mit einem halben.  vnd stet von dem Equinoxial
16 grad nach der breyt alls Hali halbenragel schreibt.  vnd an der
leng hat es 180 alls ein yczlichs clima. wie wol das. das letste
kurczer ist an der geschikligkeitt dan das erst yedoch hatt es eben
dyse 180 grad als das allirlengst yn disem clima ist der tag 13
stunden. vnd 9 minut vorstanden an dem end diss climats an dem anheben
abir pey dem equinoxial hat es 12 stund vnd ist groß an der breit dann
der andern yndert eins vrsach halb.  das die sunn von disem clima auß
dem breiten weg 30 diaci das ist dess tiersteigs nicht geweichen kan
auff oddir ab vber 23 grad von dem equinoxial vnd von deßwegen
bescheinet si mer diß teil der erden wan si geleicher doruff
niderhengende ist irer strene dann auff ein ander clima.  vnd so si
dan gleich vnd nit seitenhalb dorauff scheinend ist. so kan man nicht
also bald verwandlunge des tags alls in einem andern clima gespüren.
auch haben die menschen yn disem clima die sunn vber iren heuptern
gleich sten zweymol ym Jor vnd wirt genant zenit vnd das wert nicht
lenger dan alls lang dy sunn yn dem selben grad des mittags beharrend
ist.  vnd alle ynwoner des climats die haben zweierley schatten ein
gegen mitternacht so die sunn geht zu dem zirkell des Creps.  den
andern schaten so si wider get gegen mittag zu dem equinoxials zirckel
// diser schatten mögen nicht groß sein so die sonne etlicher moß
gleich vber yn stet von deßwegenn kan man auch nicht also schier
spiren dy verwandlung deß tags allso do. do die sunn grossen schaten
wirfft alls yn europa.  vnd ee weiter gegenn mitternacht von dem
equinoxial ye weiter vnd lenger die sonne von den stenden materlichenn
corpern schate wirffet.  widerumb alls nahe dem equinoxial deß kleiner
vnd neher schatten.  Auß disen vorgenanten sachen mag gezogen werden
wie das alsobald ein land gefunden wirt ligend außwendig disen dreyen
zyrkeln der sunnen leichtlicher gespurt mag werden groß verwandlun[g]
deß tags dan yn disen landen dy do vndtirworfen sein dem weg der sonne
das ist dem Tiersteyg alls vorgesagt ist.  von deßwegen haben dyse
menschen yn dem 7 clima lenger tag dan dise vnderr dem tropico cancri
oder capricorni.  dise verwandlung der tag vorendert sich von dem
equinoxial bis zu dem zirkel artico. den man nent zu teütsch den wagen
am hymell allso das dye selbigen menschen disem gestirn vndderworffen
ein halb Jor tag haben. das ist von Gregori byß vff Lamperti.  Jst von
dyswegen wan dise menschen haben ir zenit vnder dem polo artico.  So
muß von notes wegen der equinoxial sein yrer Orison. das ist der zirkl
dorynn di sonn vff vnd nider get vnd so bald di son sich ne[i]gt von
Equinox.  gegen mitnacht so get in ir tag // an vnd so die sonne wider
von dem equinoxial sich neyget gegen mittemtag. get yre nacht an.
alls man wol sichtigklich dise dyng sehen mag yn corpore sperico Diß
erst clima hat nach der breit 440 meilen alls leupoldus seczet vnd dy
erhebunge des poli das ist der ax des hymells yn disem clima das ist
16 grad von yrem orisonte.  dy stet ym ersten clima sind dise
vorderlichsten. arim. thana haw. manna. gecz. terre
yndie. affar. cerugk.  amedia yn affrica. Facili yn yndia. Zabech ym
mittell dy stat des kunigs alcimbenis.  anthimantipeda amenia. dy
statt des reichs magogk. ceda am ent


das ander clima diasienes

[D]Js clima wirt genant dyasienes. von der stat siene dy do leit vnder
dem Tropico cancri dauon lucanus also spricht Umbras nusquam flectente
siene.  wie das der schatten der menschen oder ander corpern nymer
gelengt oder gebrochen wirt vorstanden ym mittag desselben tags so dy
sonne ym kreps ist.  dy grost leng deß tags yn disem clima ist 13
stunden. ein /2 vnnd 1/4 vnnd hat an der preit 29 grad vnd 12
minut.  das bedeut 400 meiln hy vntten bey vns.  vnd dyß clima durch get
dy gelegenheit zyn vnd yndie vnd gett halb durch affricam dy erhebung
poli yn disem clima ist 24 grad.  dy furderlichsten stet yn dem andern
Clima sein. Mecha // anburi.  dy stat des künigs von yndia.  des künig
es stat von zyn.  deß konigs stat der moren. iurgen. erana.  almansora
almediana. alre. thebim cordula am end


Das dritte clima dyalexandrios

[D]ys clima anhebend vom orient durchget das gelopte land vnd durch dy
end egypty begreiffend dy statt alexandriam dye do ligt in de[m]
achten paralel vnd vnder dem sechtzigisten meridian.  dauon dann das
clima genant wirt dyalexandrios yn kriechen vß diser statt ist gewesen
ptolomeus claudius.  von deßwegen er dy zall der meridian anhept zu
zelen wyweit ein yczlicher meridian gestanden ist von alexandria.  dy
leng deß tags yn disem clima ist 14 stund vnd 15 minutt an der breite
aber hatt es 33 grad vnd 40 minut das macht 550 meilen auff dem
erttrich.  dis clima hat dise vorderlichsten stett alls
wedecz. Catiduquia. new babilonien. alkayr. albertim. granaten
hyspanie Jsta dy stat des winden. Jor. fugica egipty.  alexandria
damnata. alkuffa. cartago hierusalem. damastum.  dye erhebung poli yn
disem clima ist 30 grad vnd 30 minut.


Das vierde Clima dyarodus. //

vOn der stat rodis hatt das clima seinen namen wan es dy gancz insul
Rhodis.  vnd cabros yn ym beschleust vnd hatt an der braite 39 grad
gleich macht pey vns auff erden 300 meylen vnd grosse des tags yn
disem clima ist 14 stund vnnd eyn halbe dysen ynwonenden menschen yn
disem teil wirt der Polus erhabenn 36 grad vber yren Orizon dyser
zirkel orizon ist dorynne dy sunn vff vnd nyderget vnd endet vnser
gesicht.  also vorstanden so ein mensch stunde auff einer hoe vnd sech
vmb sich lantschafft als weit er mocht.  so sicht er einen zirkll dem
ertrich gleich an dem firmanent zu ring vmb welchs zirkels centrum der
selb mensch macht wo er stehet.  dy trefflichsten stete yn dissem clima
sein dy Maiorica sibilia sardinia ynsul sicilia ynsul pannoricum dy
stat persi.  aldt babilonia balach eduni a thilus ynsula yndie.


Das funffte clima dyaromes

dys clima anhebend yn orient durchgehtt dy stat Rom von danne is
genant wirtt vnd ander vmbligende stete vnd lanthschafft.  vnd hat an
der breite 43 grad abstend vom equinoxial macht 255 meiln pey vns
gerechent.  dy grose aber des tages ist 15 stunden vnd polus articus
wirt diesen menschen erhaben dy hyrinen wonen sei von yrem orizon 41
grad vnd ein tercia das ist ein 1/2 eins minuts // Dy mechtigisten
stete yn dissem clima sint disse Ragos. Lisbona.  tholetum. cesaria
augusta. neapolis. tharentum. roma. facar.  ym mittil dis climatz
Sena. perus.  amesa. tholoza der berg. pessulanus. anchora
thaurinum. valentz am ende


Das sechste clima dyaboristenes

wJrt genant dis clima van des wassirflisses boristenes das durch
rewsserlantt flewsset vnd felt yn das schwartze mehr.  an der preite
hat is 47 grad vnd 15 minut gerechent vam equinoxial gegen miternacht
yn dem polo artico dy groest lenge des tages ist 15 stunden einhalbs
vnd ein 1/4 dissen ynwoneren wirt dy als des himils erhaben 47 grad
vnd ein 1/4 vnd hath yn ym disse greste stete Massilia.  genua dy
gegenheit. wyenn. mediolan. ferer bannomia. compestel. Portigal.
prix. venedig ym mittil des climats. constantinopul Costintz
straßburg.  villacum disse preite des erttrichs ist 212 meiln gerechnet
vom mittag yn mittirnacht


Das sibend clima dyaripheos.

[G]enant vrspringlich von den pergen ryffey dye do gehn durch reyssen
vnd mosquitten vnd diß clima ist das aller kurtste von orient yn
occident das macht di engheyt der kaull oder deß zirkels der
erden.  vnd hat an der breitt 50 grad vnd 3 minut vom equinoxial vnd
macht yn // dy preit der meilen 185.  dy gröst leng deß tags ist 16
stund 15 minut.  dyse vornemlichsten stett ligen yn dysem
clima. Paris. Ulm. augusta vindelicorum. Munchen. Salczpurg. wyen.
Ofen. Roto magos. Colln. Agrippina. Mencz. wirrtzpurgk
Nurnberg. Jngelstat. Ratisbona.  Erford. Lipczg Prag.  Mit disem 7
clima beschliessen vil astronomi dy ynwonenden land als diser
ptholomeus Dyonisius tessalonicenß.  Anßhelmus de vergine mundi. vnd
ander vil mit ym sprechen alles das do funden wirt außwendig disem
climata sol nit geacht werden vor ein clima wan worumb man findet
nicht alls vil besaczter land gegen mitternacht alls gegen mittemtag
yn dem vierteyl diser kaull dorumb schaczen si es fur klein ding
hermes aber der pphus seczt dorczu das achtet clima vnd dyse stat
dorynn kunigsberg. Danczgk. magdeburg. Braunczweigk. Crokau. Breßlav.
Lubeg. [...]antisten. Jrland. Schotten vnd schweden also [i]st dise
bekante werlt geteylt yn 7 teyl alls dan dauon gesagt ist.  vnd hat an
yrer breit vberal als ptolomeus seczt 180 000 tausent gewend das macht
20 000 meylen vnd 40 meilen.  ein gewend ist 200 schrit zwey gewend
machen 1/4 zwey vierteil einhalbs meyl zwu halb machen ein gancze


von den meridians zirkeln

es ist zuwissen das dise zirkels linien di do gen von einem polo yn
den andern.  wer- // denn genant Meridiani.  allso schreibt ptolomeus
wie das meridianus sey ein zirkel linia glei[c]h durch vnser cenit vnd
teylet vnsern orison yn zwei teyl beyde polos treffent vnd
durchschneidet alle climata vnd paralelln yn kreiczwyß.  diser meridian
alls ptolomeus seczet der sein 36 vnd yczlicher meridian helt 5 grad
so kompt es. das do 36 mal 5. macht 180 also vil grad seyn yn einem
halben czirkel.  yn der figur dises buchleins findet man nicht mer wan
dy meridians linien halb. das ist 18 das ist gescheen von wegen der
kleinheit diser figur auff das man dy linien nicht sere nahen bey
einander seczt sunder yn moß disem wercke dienend.  vnd sind doch
gleichwol volkomen an den graden allein das die linien nicht geczogen
sein so ist zumerken das yn diser gegenwertigen figur eyn spacium 10
grad beschleust vnd so machen 15 grad 3 meridian das bedeut hye yn der
figur anderhalb spacium daz hatt ouch eben alls wol 3 meridian alls
ptolomeus seczt vnd 3 Meridian machen allzeyt ein stund.  das wer 15
grad.  diser meridian saczung ist von deßwegen das man lychtlicher
finden kan wye weit ein stat oder land vom obend oder morgen ligen mag
so vindet man ouch wy vil stunden ein land ee tag hat dann das
ander.  alls das lant zu klein polen haut ee tagk dan hispanienn czwu
stund 1/2 .  gleicherweyß priester Johann yn yndia hatt Ee tagk yn
seynem lannde vier stundenn .  // 

dann der moscobitt also mag man ouch sagen von stetten dy statt crakaw
hatt er tag 1/4 einer stunden dann nurembergk.  disse geschichte komen
alle von wegen der runtheith des erttrichs wenen worumb dy sonen kann
nymmer bescheinen das erttreich gantz sunder allein dy helfft von des
wegen so dy zonne yn orient awff geht vber den gemeinen orizon zo
bescheinet sy ein vierteill yn dem obren emisperio vnser weltt vnd ein
viertteil yn dem vnttirn welche zweier vierteill machent ein halb
teil.  so mag man nun merken das 18 Meridian sind yne eynem viertel
eins zirkls Und 3 meridian machent eine stund so kompt ys das dy yn
orient yn der statt.  kathigara ee tag haben 12 stunden dan disse zv
lispon in hyspanien das mus verstanden werden so dy sonne ist im
equinoxial vnd das ertrich glich von der sonne beschinen wirtt.
habent wir verstanden das di statt kathigara 12 stunden ee tag hat dan
lispon.  so mus dy sone abir so lange ober daz ertrich strichen bis sy
kompt yn occident bey lispon das sind ouch 12 stund so wirt si yn 12
stunden das ertrich gleich vbergan.  vnd vntten 12 macht 24 stunden
das ist ein natturlicher tag.  so aber sich die sonne neiget von dem
equinoxial so machet sy den gegen mitternacht grosse tage So aber
iemant gern wissen woltt wi vil meilen di sonne liffe auff dem
erttrich gerechnet der thu im also Er nem dy grad di der zcirkel der
sonnen hatt der sint 360 vnd teille disse durch 24 stunden so komen im
15 das sintt di // grad also vil loufft si grad eine stund Darnach nim
15 vnd multiplicier das ist manchfeldige si durch 60 wann ein grad
hatt 60 meiln gemeinlich avff der erden gerechnet so koment dir 900
meiln also vil loufft si eine stund.  auch ist zw wissen das sich di
meridian in miternacht vnd in mittemtag sere enge vnd alle vff einen
punct komen.  Und doch glich wol ire eigenschafft irer grad also
volkomen behalten am end als im mittil vnd wie nohet das die lineen
pei enander stehn pei den zween poli.  doch gelichwol hat ein ietzlich
spacium 5 grad also volkomen als do si preit sein vnd disse grad engen
vnd vorinngen sich also sere das ouch menschliche vornunfft dy selben
grad an der zal nicht begriffen kan


Hienach sagt es von den zwelff windenn.

in disse kawle des erttrichs. wegenn vnd blozent 12 winde in
mancherlei weisse etliche mit storm vnd vngestimugkeith. etliche linde
vnd sanffte etliche trucken vnd durre etliche feuchte vnd naß etliche
kalth vnd wesserig. vnd alle nacheinander 

So ist zu wissen das 4 forderliche winde sein vnd 8 zwfellige di
forderlichsten 4 yn der figure bezceichnet.  sein genant ym latein
subsolanus fauonius aspericus vnd auster dewtsch // wirt genant
Subsolanus Ost.  der ist sanfft vnnd lind blosend von orient Der ander
Fauonius wirt genant west wehend von occident.  vnd ist miltygklich dy
blümen bringen Der drit weend von mitternacht Apercias genant. wirt zu
deutsch geheyssen Norden vnd ist von natur kaltt vnnd schneygk Der
vierd mit namen auster wirt czu teutsch genant Süden vnd kompt vom
mittagk.  von natur naß vnd warm diß sein dy forderlichsten viere 

Die andern 8 komen auß disen vieren alls von Osten komen zwen seytner
der ein gegen mitternacht heyst Ostnord auff latein Eurus vnd pringt
tunckel wolken.  der ander gegen mittag der heyset Ostsüd ym latein
Uulturnus dieser truckett vnd tawet.  Der ander heist Fauonius auff
teutsch west. vnd hatt ouch czwen seytner.  der ein gegen mitternacht
heyßt Chorus yn latein. czu deutsch westnord diser bringt Nebel yn
klarheyt.  der ander hat er gegen mittag vnd heyßt affricus. tutsch
westsüd vnd ist von natur stormig mit regen

Der dritte heißtt apercias yn mitternachtt vnd hat ouch zwen seytner
den einen gegen orient vnd heyßt aquilo oder boreas.  teutsch Nordost
vnd ist von natur kalt vnd trucken.  den andern hat er gegen occident
vnd heißt Circius. teutsch nordwest vnd ist von natur schneygk vnd
hagelicht Der vird heyßt auster vnd hat ouch zwen seytner.  der ein //
gegen orient vnd heißt Sudost. lateynisch euronotus vnnd ist von natur
warm yn mössigkeit.  Der ander ist gegen occident vnd haist ym latein
euroauster.  auff deutsch Sudwest vnnd ist von natur gancz varm Diß
sind dy zwelff wind dornoch sich dan die wether vorwandlen auff diser
werlt.
 
 				Ostnord von mitternacht
Orientalis 		Ost
vom vffgang
 				Ostsüd vom mittag

 				westnord von mitternacht
occidentalis 		west
von nydergang
 				westsud vom mittemtag.

				Nordost von orient.
septemtrionalis 	nord
von mitternacht
 				Nordwest vom occident
 
 				Südost von orient
meridionalis 		Süd
vom myttag
 				Sudwest von occident //


Uon teilung der irdischen werlt

gEnczlich vorklerung diser ding dy vns dienen außzumessen vnd zuteilen
dyse vnsere bekante welt genugsam geschehen ist.  beide zu erdtrich
vnd zu mere berge vnd fliß wy und wo yczlichs gelegen sey.  yn was
teyl der werlt. vnd yn welchem Clima. neben welchem paralell vnder
welchem meridian das dem leser leicht zu finden wirt sein.  so er dise
vorgeschribne ding wol vernomen hat vnd si merken wirt.  So ist
zuwissen wie das vnser ober emispe[re] vnser werlt wirt geteiltt yn ym
selbstt.  dornoch wirt es voneinander geteilt durch mere dornoch durch
perg vnd ouch durch flyß.  zu dem ersten wirt es geteilt yn ym selbst
das ist yn drey teil als yn Asiam. Affricam vnd Europam.  zu dem
andern werden dise drey teyl von einander geschayden durch die mere.
das ist alls asia wirt gescheiden von europa durch pontum eurimum.
das ist das swarcze mer vnd durh das mer egeum.  zum andern mal
scheydt sich asia von europa durch gepurg.  das ist zu latein genant
Riffeum.  zum driten wirt europa geschyden von asia mit dem flyß
tanays das do entspringet yn dem 18 paralelln vnd 70 meridian auß dem
perg Riffei.  affrica wirt geschaiden von europa. durch das mittel
meer vnd durch di enge herculis zum andern mol wirt affrica gescheyden
von // Asia durch Sinum arabicum.  Das ist durch das arabische hap deß
rotten meres Zum dritten mal wirt affrica geschaiden von asia durch
den alleredelsten fluß Nilum.


Uon den meheren

[A]Uff dieser kaull dess erttrichs.  vnd dorumb vindet man forderliche
dreyerley mehr dy dyse kaul des ertrichs vmfliessen  Das erst meer wirt
genant in latein mare extraneum oder externum. zu teutsch dy offne
se.  dyß mor hat eyn hap das do genant wirt Hesperus sinus.   aber auff
teutsch ist ein vsgewaschen hol oder kluns yn das ertrich nicht gleich
dem rechten vber auff teutsch eyn hap widerumb wirt zu zeyten gesehen
ein erttrich das sich wirfft vnd streckt in ein groß mör. vnd wirt
genant auf kriechisch chersonesus. zu teutsch eyn vorschuß ein reff
oder vorschus deß erttrichs.  so hat das mör ouch ein vorschuß genant
zimbricus der sich strekt gegen mitternachtt von orient vnd hat
ettliche schene ynsuln hyberniam das ist yrland. Engelland. Daciam.
Norivegen. Sweden. Gotland vnd Schön. von dan dy schene hering komen
Das ander mer wirt genant Mediterraneum vnd hat ein hap das do genant
wirt adriaticus welchs hap schaidet kryech[e]nlannd vnd welsch land
vnd hat dyse vorderlichsten ynsuln als Ciprus Rodis Candiam Siciliam
Sardinam Euboeam.  Nigropont Curson vnd Cursicam.  // 

Das dritt mör wirt genant yndicum.  das ist das yndische mehr vnd hat
diese hap Bangeticum persicum arabicum vnd das grosse hap yn orient.
ouch hatt es ein forderliche ynsul Taprobana genant


Uon den teylen Europe

[F]Urderlich zu sagen wy dy teyl diser yrdischen kaul geteylt vnt
geschaiden werden durch fliß vnd berg yczlichs yn sunderhait.  So
wellen wir an heben an dem teyl europe vnd dyß teyl also zu gliden vnd
außlegen 

Europa wirt genant von der tochter dess kunigs Generois yn Libia dy do
genant was Europa.  Alls von yr dan dy poeten schymflich
schreiben. wie das Jupiter gegen yr hiczlich yn lieb was entzundet vnd
mocht si bey dem künig generois nicht zu willen haben do nam er an
sich ein gestalt eins ochsen vnd schwam vber mör zu dieser
iunckfrawen.  vnd si auff seinem ruck fassend. füret er si vber mör
vnd pracht si yn europam dauon hat dis teil seinem namen.  diß teyl
hatt yn yme vil schoner berg dy do alle vrspringlich von einer worzel
komen.  welche hoe der würczell aller geburg yn disser europa ein
ursprung gibt vnd wirt genant Alpes auß welchem perg dy grösten fliß
yn europa entspringen. alls der rein der do fleüst durch teutschland.
Rodanus der do fleust durch franckreich Dy thunav danubius genant dy
do fleist durch Payern Steyern Hungern vnd Ostereich.  Und ouch //
durch dy walachey vnd felt yn mare Ponticum.  Padus flevst durch
Lumbardey vnd welschland Der vorgenant berg wirfft von ym drey armen.
Der erst get durch Swaben. behemen. slesie. bis in bolen. do wirt er
genant Carpatus das ist krumppach dornoch durch revssen vnt wirt
genant Riffeus dornoch durch aziam Der ander arm get durch
sweyczerland durch Payern Steyern. schlauonien. walachey vnd durch
Criecherland bis gegen Constantinopolim do er sich an dem mör endet
Der dritt arm gat durch gancz welschland vnd teylt das in zwey teil.
do mit yn gemeinheit sey gnug gesagtt von den teyln europe yn
sunderhayt aber also


Hybernia yrland.  Albion Engelland 1

Hyenach ist zu mercken das dyser Numerus yn der figur ouch
verczeichnet ist.

[D]Jse zwu ynsuln ligen ym occident yn dem 18 paralell vnd vnder dem 4
meridian das sind 25 grad vom occident vberal mit dem eustern mör
vmgeben vnd gegen mittag haben si dy land von franckreich.  yn der
ynsull albion oder brittania ligt dy stat lundin dess kungs von
Engelland der eyn herr ist dyser zweyer Jnsuln Britanie vnd hybernie
//

Jn disem yrland findt man menschen dy do swencz haben an yren
hynderteyln grob sind sy vnd vnedel vnd haben yn diser gegenheyt schön
vich czu narung py disen ynsuln sind dy orchen oder norwegischen
clippen 30 yn der zall.  auch hat dyse ynsul albion einen schönen
lustigen wald Cottidunia genant nuczlich von gutter waid bey dises
lands gelegenhait entspringt ein schön flis Liua genant fallend yn das
teutsch mör dise ynsulln haben den lengsten tag 18 stund vnd ein grad
nach der leng helt eyn grad 32 meylln 1/2 .


Hyspania 2

[H]Yspania leyt ym occident vmflossen von obend mit dem ewssern mehr.
von mittag mit dem yberischen mer vnd mit der enge herculis auch mit
dem Ballearyschen mör.  von miternacht mit der offenbaren se vom
morgen wirt das land beschlossen mit den bergen Pirrenes.  vnd wirt
beschlossen zwischen dem ersten vnd dritten meridian vnd czwischen dem
11 vnd 14 paralell.  dise gegenheytt hat siben kunigkreich alls
Portigal Granate Nauarre Hispanie Castelle Kathelonie vnd Gallicie.
yn dysem kunigkreich gallicie leyt Sant Jacob zu compestel yn dem land
Bethica zugehörig dem künig von hispania ligt ein stat Cordula genant
von dan ist burtig gewest Seneca der maister ouch ligt eyn stat yn
hyspania Lispon genant do ist groß handt-//lung vnd nyderlag europe
vnd affrice.  dy forderlichsten flisss yn hyspan[i]a sind dyse Tagus
Hyberus Betis. doria. vnd pisarga. Hiberus vnnd Pysarga entspringen
auß dem berg vindio Tagus vß dem berg ortospeda dy grest leng deß tags
yn hyspania ym mittl ist 15 stund.  ein grad macht nach der leng 47
meiln.


Gallia Franckreich 3

[F]Ranckreich das lantd wirt gelobt von fruchtbarkeyt der menschen vnd
deß vichs mit guter bequemikeit aller nottturfft.  vnd ist gelegen vom
occident das ist von dem gemeinen orison ym obend 18 grad das ist yn
dem fierden meridian vnd get bys auf den 7 meridian von occident vnd
ligt zwischen dem 15 vnd 30 Grad Yn Franckreich ist der lengst tag 16
stund.  yn dysem franckreich sind vil löblicher stet dy von kurczwegen
hye nit benant werden yn dysem franckreich ist eyn gegenhaytt Reynland
genant dorin coln leit vnd ander vil namhafftiger stett ouch sein yn
dysem vorgenanten frankreich vorzeyten gelegen Picarden Prabendern
Lotringen Elzezir Schweiczer westrich vnd ander vil nacion czu streyt
wol tugendhevtt greme zind mit germania dyß teyl offtgenant hat dy
perg Alpes doruß entspringen Dye czwen schön flyß Reyn vnd Rhodanus.
vnd das sind ouch dy trefflichsten wasser yn dissem land. //


Germania nyderste teutschland. 4

[D]Js teil wirt beslossen von mitternachtt mit dem germanico mör das
ist das teutsch mör Am andern teil mit dem sarmatischen mör gegen
mitternacht von dem morgen mitt der weichsel vom obend mit dem Reyn
vom mittag mit der thunav Dise germania leyt von abent 30 grad.  das
ist der 6 meridian vom obend vndt get bys yn den 9 meridian.  Und merk
alweg das ein spacium in diser figur 2 meridian bedeit vnd leyt
zwischen 13 vnd 15 paralelln gegen mitternachtt Dy namhafftigste perg
yn germania sind arme von dem Swiczer gepurg.  diser berg lengt vnd
breitet sich durch Peyern Behemen vnd slesie etc.

Und dise germania hat dise grösten fliß domit si bekleidet vnd geedert
ist als der Reyn der ouch in franckreich verzeichnet ist.  das ist von
deßwegen das sich dy herschafft der selben land offt verendert hatt
ydoch ist der Reyn ein vnderschaid zwischen frankreich vnd teutschen
landen Dornoch ist yn germania dy thunav dy do aber scheidet
teutschland Ostereich vnd vngern Dornoch dy Elbe.  dy ader. di
weser. dy Mora. Regus dauon Regenspurg wirtt genant.  dis land hat 15
stund tag 1/2 vff das lengst. vnd helt yn ym dise Nacion. Schwaben
Francken Peyern. westualen marker Pomern. großpoln. kleinpoln. merher.
slesie. Behemen. Frisen. Hollender Brabender.  Schweiczer etc. //


Gotland. norwegen. schweden.

[D]Jse land ligen in der offenbaren se auff allen orten vmflossen vnd
ligt ser gegen mitirnacht vnder dem 21 paralell vnd zwischen dem 9 vnd
10 meridian vnd ligt von dem gemeinen occident 40 grad.  vnd ein
zweyteil ouch haben ander vil land grenicz nohe mit disen Alls holland
engronen la[n]dt. venteland. vermeland. emland. leifland.  vndt dise
land haben tag 21 stund vffs lengst gegen mitag aber do ist seland
lauland. sicholm. bernholn. falster vnd ander vil ynsuln dy von
kurczwege nicht verczeichet werden.  Es wirt ouch gesaczt von der
Figur ptolomei.  Eyßland vnd das geliuert mör das ligt als vßwendig
dez zirkel artico gegen mitternacht di selben haben tag 3 Monat langk


Pannonia Hungern vnd Ostereich 5

[D]Je lantschaft also genant ligt von dem gemein occident yn yrem
anheben 30 grad.  das ist der 6 meridian vnd begreifft in der leng 3
meridian 1/2 das ist biß yn den 47 grad.  vnd wirt beschlossen von
miternacht mit der tunav von mittag mit dem venedyschen mor von orient
mit der theysse von occident mitt den hohen alpen pergen.  von disen
alpen kompt durch dise pannonia ein arm vnt scheidt di winden das ist
das lant illiris vnt liburnia.  von beiden teilln Hungerland.  Dise
pannonia wirt geteilt yne czwey teil als in panoniam das ober vnd das
niderland.  das do wirt genant das niderteil wirt gancz hungerlant
beslossen mit der stirmark crabaten //

Das ander wirt genant das oberteil.  das ist ostereich.  ouch hat es
weyte vnd grosse gegenheitt reciam das ist corualen vindeliciam das
ist hochswaben Noricu das iß bairn. ylliris vnd liburnia das sind
windische land. dy gresten stett hy yn swoben pey Ostereych.  vnd
steirn ligend sind Augspurg landshut vnd regenspurg.  Yn ostereich dy
forderlichste stat ist wyen.  yn diser gegenheit ligt der berg
cecius. den ma[n] nent kalenberg.  dy grosten flyß yn hungern sind
dise dy Thunav dye saw vnnd dy teysse dy vorgenante land haben grosten
tag 16 stund dy an der thunav ligen.  dyse land aber dy do ser lige
gegen mittag dy haben 15 stund vnd 1/2


Jtalia welschland 6

[W]elsche land sein gelegen yn europa von dem occident mit irem
anheben 29 grad.  das ist yn dem 6 meridian an czwen grad. vnd streket
sich yn den morgen bis auff 43 grad das macht von occident gerechent
dy preyte ytalie gleich drey meridian  Diß land wirt vmslossen vom
mittag mit dem Tirrenische mer von mitternacht mit einem arm von den
alpenbergen.  von orient mit dem yonischen mer von occident mit dem
sweyczer gepurg.  dyß land wirt geteylt yn 2 teyl alls yn lombardy vnd
yn welschland.  yn dyser gegenheyt sind etliche namhafftig stet als
Genva. mediolan. florencz Rom. Venedig. neapolis vnd ander vil stet dy
hye nit genant werden.  ouch hat // diß welschland vm sich vil schoner
ynsuln dy vorderlichste vnd schonste ist cursita. auff tutsch cufrum
Dy namhaff[t]igisten flyß in ytalia das sind dy zwen. Padus vnd
Thiberis.  padus entspringt auß den bergen alpen vnd velt yn das
venedisch mer genant zu latein sinus adriaticus.  Tiberis aber velt yn
das Tyrrenische mer gegen mittag gelegen yn disem land ytalie wechst
gutter wein das doryn das pöst ist


Sicilia Sardinia ynsulln 7

[D]Jse zwu ynsuln ligen in dem mitelmör vnd sind vor zeyte gestande an
dem la[n]d ytalie.  sunder durch vngestyme deß mörs sint si
abgesundert von welschen landen vnt sind gelegen von dem obend
yczliche yn sunderhait wan sardinia lign vom abend ym 6 meridian das
ist yn dem 30 grad vnd sicilia ligt yn dem 7 meridian das ist vom
obend 35 grad vnd ligen zwischen dem 10 vnd 11 paralell vnd dem 4
clima vnd haben tag 14 stund 1/2 1/4 In der ynsul sicilia do ligt der
berg Ethna der do ewig print.  Das ist von deßwegen. Dyßer pergk ist
gancz löcherig vnd mit sweuelichte ercz durchedert Und so dy wind
dysen berg durchblosen erwecken si es vnd wirft von im ins mer feirig
kolen des swebels von deßwegen ist stet vngestymigkeyt vff dem mer.
dise ynsul stet gancz auff einem swarczen locherigen stein Topos
genant den man hie yn disen landen braucht.  yn dem baden sich domit
crawen oder // yucken das do gemainer ist bey den froven dan bei den
menern ouch vint man am vber diß mörs tyrrem das do siciliam besleüst
von mitternacht den stein bombes do mit man pergamen slicht vndt ist
schatin des mörs yn derbheit gewandelt von der sunnen.  yn diser ynsul
fint man. alls man spricht das loch patriey dise ynsul helt der kung
von arrogonia


Jtem sarmacam europe reyssen liten 8

[I]N sarmacam vint man nitt vill sunderlichs von schönen steten aber
von sinreichem volk als yn andern landn sunder vil wüstung grosse
haiden. breit land. wenigk volk vnd halp Cristen vnd wirt gehalten von
dem polnischen kunig ligend von obend mit seinem anheben der grenicz
44 grad das ist yn dem 9 meridian vndt streckt sich yn orient bis auff
63 grad das ist bis yn den 14 meridian dy breit ist deß lands 4
meridian das ist 20 grad Ein grad nach der leng yn disem paralell
machtt 40 meiln welsch.  vnd wirt beschlossen zwischen dem 15 vnd 20
paralell gegen mitternacht ligen yn disem land sein
reussen. litten. massurn mosquiter an der grenicz.  ouch poln. thatern
yn welcher thatarey dy stat kaffa gelegen ist ouch hat das lant
schöner fliß zwen alls den nepper vnd den nester beide fliessen si Ad
pontum eurunum.  das ist yn das schwarcz mör.  durch diß land get ein
arm des gepurgs von den alpen auß dem schweiczer gepurg.  yn disem
land ist der lengst tag ym sumer 16 // stund 1/2 Ligent in dem 7
clima.


Dacia walachei. 9

[D]as land wirt genant di groß walachei.  Ouch wenig namhafter stet
haben.  außgenomen di anstossende land di in dissem teill europe
begriffen sein als do ist sibenpurgen Ein fruchtpar land von wein vnd
getreid teutsch volk habend vnd wirt genant von ptolomeo.  Jaziges
metanestum vff kriechisch.  auch heltt diss teil die gancz disputei
oben vnt niden di sirfen vnd dardinen vnd boßnerlant das ist misia.
diß land stosset von orient an das schwartze meher von obend an
illiris das ist winden landt von mitternacht an sarmacia. ewrope vom
mittage an macedonia das ist criecher lant durch disse gantze
wallachei flewsset di thunaw vnd pei kilian vorlewsset si den namen
vnd heisset ister vnd fellt in das mehr an sechs enden.  ander wasser
mer hat disse gegenheit di man klerlicher sehen mag in ptolomeo de
situ orbis.


Macedonia criechenlant 10

[M]acedonia wirt gesprochen von dem kunige macedon vnd ist gewest das
vatterland allexandri magni der di grosse werld bestritten hat dis
landt leit vom abendt 45 grad das ist in dem 9 meridian vnd geht bis
in den 11 vnd wirt beschlossen mit den adriatischen mehr vnd mit dem
mehre ionio // gegen occident mit dem mör Egeo vnd cretensium von
orient von mittage mit dem mitel mör von mitternacht mit dem sirfin
vnd Boßnerland dys land Grecia yst gewest ein Muter aller kunst wann
auß yr ist komen dy Lateynisch sprach vnd ander vil bucher dye dy
krieche gemacht haben vnd dornoch sein sy procht yn latein von dan wir
diese kunst vrspringlich haben alls dann diser münch der do yrfaren
gewest ist yn kriechischer sprach der dan diß werk in latein pracht
hat das do sunst villeicht in ewigkait vorhalten wer worden bei den
kriechen vnd dise gegenheit ist geteilt in 4 teil. als in macedoniam
Eupirum achaiam vnt poleponesium in diser gegenheit vint man vil
schöner stet. als athene. Thebe. Metropolis. Tessalonita. causandria
vnd ander mer die do von kurczwegen hi verswigen bleiben.  Bei disem
Macedonia ligt in dem mör di Insul creta oder candia.  vnder dem 11
meridian vnd zwischen dem 10 vnd 11 paralell di Insul Lempnos ligt
vnder dem 12 paralall vnd 10 meridian mit ein 1/4 .  vil ander Insul
sind in grecam di do von ku[r]czwegen hie nicht gemelt werde.  domit
sei gnug von diser europa gesagt.  wer aber weiter wissen wolt von
mancherlei stet.  pergen wassern vnd insuln der mag ansehen ptolomeum
mit seinen figuren dorinn er vindet was er suchent ist nach vßweißsung
der graden


Zumercken was buchstaben oder littera europa in iebung der sproch hatt
//

[D]ise gancze europa braucht gemeinlich zweierlei littera oder
buchstaben alls Latein vnd kriechisch ouch wenig rewßisch. Das do
kompt vrspringklich auß kriechischer littera.  Aber lateinisch littera
hat einen vorgang vor allen andern wan worumb man magk schreiben mit
diser lateinischen litter allerlei sproch di man deütlich kan
außreden.  ydoch forderlichen brauchenn sei Francosen walben Teutsch
Behem. vnd Englisch.  di kriechisch zung gät in Grecia Macedonia
Epiro Achaia vnd ein teil in Azia minori vnd ouch in moßquiten mit der
Revßischen litter yn sproch so endern sich alle land vnd nacion 

irland vnd engelland redenn teutsch.  ydoch anders dan in hispania vnt
in gallia.  in norwegen sweden Brabander Hollander Merker
Paier. Sachßen anders dan di Merhern slesier hungernn sibenburgen
redenn annders dann die Ostereicher steiermarcker schwaben vnd in
ander teutschen nacion vnd sein doch alle von teutscher sprach ouch
endern sich di poln von den winden Behanen rechten breissen von den
littaven von den revssen allein hungerland helt vnvermist sein sproch.
Auch ist czuwissen das di lateinisch sproch hat gestanden vber 600
Jor.


Uon den teilenn Affrice oder Libie 1 //

[D]Js dritte teyl der werlt wirt geteilt in 4 teil alls yn mauritaniam
yn affricam minorem yn egipten vnd yn ethyopiam.  das ist yn morenland
vnder egipten.  Dyse Affrica wirt genant von affer Abrahams sun
gewest.  der am ersten dy teyl der werlt hat gebavt.  ouch wirt es
genant Libia von dem winde libius oder affricus auß dem winkel des
obends vnd mittags blosend.  vnd bewegt stetes yn vngestymikeytt daß
mör dis lands. von deßwegen hercules lies durchgraben das erttrich des
bergs Calpe auff das. das das mittelmör möcht haben ein vßgang yn das
ausser mör doselbst seczt er hin sevle vermeynett eyn enden do sein
der werlt wann hercules waß auff dyse zeit eyn herr vber dyse zweyteyl
affricam vnd europam do besorget er sich das dy vngestymigkaitt des
mörs ertrincken mucht vil seines lands macht er disem mittelmör einen
ausgang vnd nante es Fretumberculium.  das ist das wütennd mör
herculis.

Das erst teil affrice wirt genant Mauritanea cesariensis auff teutsch
Marisken land Das ander teyl heyst mauritania tinganica alias
maurenssenland welch leüt doselbst sere schwarcz sein vnd selczamer
siten nackend gend alleyn vmb yre scham bedecket das ist von wegen
grosser hicze wan worumb si ligen nohe dem weg der sonnen von
deßswegen alle doryn wonen haben getruckt kraußh[a]r sam is vorprent
wer gleich den moren.  Yedoch sind si on varbe nicht so swarcz vnd
diese barbaren // haben keyn eeliche ordnung.  sunder gleich wy es dy
Türken halten si erkennen yn elichen werken Swester müter töchter vnd
andre yre mogen vnd haben diß vor einen siten so neher gesip vnt
freündtschafft Ee bessir dy gattu[n]g ist bey yn der man vndt der
frawen Diß erst teyl affrice ligt von obendt mit seinem vber 7
grad. das ist. es hebt an yn dem ersten meridian vnd gat biß yn den 5
vnd ligt zwischen dem 7 vnd 9 paralell.  vnt hat lengsten tag 14 stund
das gebürg yn disem land wirt genantt der berg atlas welcher perg zwen
sein als der größt vnd klein.  der größ get durch dise gancze affrica
oder lybia yn der gemein bys yn egipten.  Ouch hat es etliche flyß der
namen yn disem vnserm land wenig beka[n]t seyn alls
mulus. sizaris. andus. Cilo nach. sala. vnd ander wasser mer dy man yn
den Figuren ptholomei vindet Nun furt yn dysen nachgenden landen
werden vil schöner flyß komen di vns ouch vnbekant seyn ydoch dy
vorderlichsten vnt gemeinen dy wir kennen von hören sagen di werden
ouch hy yn benumpt werden


Affrica minor.  Ist klein affrica 2

[D]Js teil ist gelegen von dem obend 27 grad. das ist über dem 5
meridian 2 grad. vnd get bis in den 10 meridian vnd 2 grad. das ist 47
grad. vnd leit vnder dem 7 vnd 8 paralel vnd wirt beslossen mit dem
mitilmör genant affricum.  von occident stost an marischkenlant.  von
orient an egipten von mittag an morland.  in disem land klein affrice
leit di stat kartago vnd ander namhafftig Stett vnd der perg // atlas
gät nach der leng dise tauel durchschneiden.  aber am vber dises lants
in dem mör do sind zwe sirtes das sein schlingender mör di sich
vndertrehn vnd was darein kompt das ist verlorn.  schiff holcz mensch
tier oder was es sey das get alles zu bodem vnd der mer sind zwai das
klein vnd das gross auff disem lant find ma sandelholcz zinomei holcz
das do tregt muschaten.  di negel sind dy stengl muschaten sein
fruchte ouch vint man manch selczam tier in diser gegenheit alls
streus. affen. elephanten. tigrides Jn disem land an etliche ende ist
es ser fruchtpar vom wein baumöl feige vnd mandel vnd an etlichen ende
ist es so voller s[an]d das zu zeiten von den winden ein perg hoch zu
hawff wirtt getriben alls dan ouch in egipten ist gescheen das der
wint offt sand hat erhaben vnd gebei vnd mensche getilgt vber den berg
atlas gegen mittag do sind vil gifftiger thier von schlangen lintwürm
tracken cocodrulln vnd ander mer .  ouch genhalb des bergs vindt man
walt esel di do groser sind dan kameltier.  dise affrica minoris hat
lengsten tag 14 stund vnd di inwoner sind ouch barbarischken.


Marmarica libia egipten. 3

[D]Js lant wirt beschlossen von mitternacht mit dem wietend mor vnd
mit dem Egiptischen von mittag mit dem geburgk affrice.  das ist der
b[e]rg atlas maior von // occident mit der bleien affrica.  von orient
mit dem roten mör aber mit dem arabischen hap. vnd fügt yn seinem
anheben vom occident 47 grad.  das ist yn dem 10 meridian on 1/2 vnd
strecket sich bis in den 65 grad das ist von dem abend 13 Meridian vnd
1/2 .  Dis land ist an etlichen [e]ndenn fruchtpar von edlem holcz als
Cipres sandl muscaten.  yn dysem land Marmarica vint man vil menung
der leben vnd der vögel Sittich. der thyre Seraphen genant.  Zygen mit
grossen preiten oren vnd plemeln das sind thyr sich den menschen ser
gleichend allein das si rauch an yrem leib sind.  Yn disem lant
regenet es gar selten aber nymer.  Sunder das Edle fliß nilus den dis
land hat ergeusset vnd feuchtet das ertrich egipti vnd macht es
fruchtpar nur soweit es das land begeust sein yrgissunng geschith
nicht von regen oder schne als etlich sprechen.  sunder von
verbandlung der grossen menyg des sands den der wind erhept vnd pringt
sterklich yn dy ynfliß nili yn das mör vnd verhelt dy wasser yn
samlung also das si vff dringen vnd sich durch gancz egipten
breiten. so bald aber dy starcken winde auffhören zu blosen.  So
gewint der nilus durch stete merung des wasserss ober den newen sand
seynen gang vnd so er vberhand nympt vnd mitt storme get furet er alle
disen sand yn das mör vntt get wider yn seinen strome recht.  pey
disem nilo sind vil der Cocodruln auch dy statt Alexandria // Ist
nicht fer do von ligent.  Ein grosse niderlag der koufleut auß yndia
arabia egipten vnd welschlanden.  yn diser gegenheit egipti ist ouch
dy stat Babilonia alias alkair do dann der Soldann wonet vnd ein herr
ist diser land. auß welchen landen vns vil specerey komend.  vnd der
lengst tag yn diser marmarica egipti ist 14 stund.


Ethiopia morland vnder egipten gelegen 4

[D]as 4 teil affrice wirt beslossen von mitternacht mit mancherlei mör
als mit dem egiptischen mit dem wietenden vnd mit dem adriatischen mör
von dem morgen wirt es begriffen mit dem rotten mör vnd von dem obend
mit dem evssern.  gegen mittag aber beslevset ptolomeus dise bekante
werlt vnd spricht wie das fort nicht bekant ertrich sey den menschen
yn disem firtel der kaulen ligend Dise ethiopia vnder egipten hept
sich an in dem 5 grad. vnd in dem 1 meridian vnd get bis yn den 85
grad. gegen orient das sein 16 meridian vnd alweg 5 meridians linienn
machen ein stund. wy vorgesagt ist.  Yn diser gegenheyt der moren
vnder egipten entspringt der edl fluß Nilus auss dem gebyrgk des
Mondes genant vnd hoth wenig perg sust dy vns bekant wern. als do ist
der perg tala. danchis maschka. Juß vnd andere perg.  welche devtlich
verzeichent werd // en yn den taueln ptholomei.  pey disem land yn dem
eussern mör ligen 7 ynsuln yn welchen mancherley wunderliche gestalt
ist der menschen vnd ouch der vnuernunfftigen thyre.  vnder welchenn
ynsulenn e[i]ne genant ist canaria auß welcher Jnsul (Alls marcianus
sagt) komen also gross hund das sie ouch dy grösten thier fellen vnd
vberwinden alls leben wilde schwein Behre etc.  eyn solchen hund hat
gehapt alexander magnus.  vnd dis land wirt geteilt yn dry teyl als in
lybiam inferiorem.  das ist vnderste libia vnd yn morland vnder
egipten vnd ethiopia interior das ist dy ynnerste gegenheit der moren
vnder dem equinoxial ligend.  Yn dem nidern libia vnd in morlad vnder
egipten. haben dy menschen dy sonne zwir vber yren heuptern vnd mussen
leiden grosse hicz der sone vnd haben gewonlych yre wonung zu haben
vnder der erden vnd vil auß yn dy sich erneren vnd aufhalten von den
wurczeln der erden vnd alls dy lerer sagen so sein alle creuter
doselbst wachsend yn voller krafft der nature dy in zugeeigent ist
diser wurczeln vnd krüter.  ist bei in onezal vnd komen ouch gegen
allexandria auff dem nilo auch sind in disem land selczamer gestalt
der menschen. alls etliche on hevpt di ougen an der brust
tragend. etliche mit einem fuz vnd anderlei geschlecht vil Alls dan
Anßhelmus schreibt de ymagine mundi.  Diß land hat stets tag vber das
gancz Jor 12 stunden //


was buchstaben der sprach.  affrica yn ubung hatt.

[G]Ancz affrica helt dy barbarischen Littern.  welch litern oder
Buchstaben eyn Junckfrav funden hat yn barbarei eyns kunigs tochter.
welcher kung genant was Cirrenes. vnd dornoch yn seyner Ere ließ er
bauen stat yn seynem namen Cirrene genant von danne dan das land auch
genant was rogio arenaica yn welcherr gegenhait vil gufftiger wurm vnd
selczame tyr gefunden werden.  Ouch halten etlich dy litern der araben
ym lateyn litere arabice. welcher arabes in egipten vil sein dy sich
neren von Rabary vnd dyberey. yr zelt oufslahen yn der wustung vndt
wen si begreiffen dy mussen sich von yn lösen vnd so si och geleit
hetten von dem Soldan der ein herr ist yn Egipten.  sunst ist ouch
eyne in arabia Felix genant doryn man ouch braucht diser arabischen
litter zu vorauß yn den ampten götlicher maiestat.  Ouch hat affrica
gemengte sproch. von Yudeischen litern caldeischen litern dy do
brauchen dye suriani machometi vnd yuden. vnd das nur yn egipten


Uon den teilen asie

[A]sia wirt furderlich geteilt yn zveitell als in azia das klein vnd
das groß.  Di klein asia hat yn dem ersten teyl 12 kunigkreich vnndt
wirt geteilt yn 6 teyl alls hernach folgtt. //

Das ander teyl wirt genant groß azia vnd ist nicht also wol mol mit
volk besacztt als dy klein azia dy der Thurk helt. vil reicher an gelt
vnd Edelgestein vnd hat ouch 6 Taueln so machtt das dritteil 12
tauel.  welcher 12 tafeln ytliche sunderlich landt vnd gegenheitt
ynhelt.  dyß dritteyl der weltheit yn ym das geburg thauri vnd Ymaus
welch perg sich strecken von occident yn orient vnder teyln dis teil
asia yn zweyteil.  Eins gegen mitternacht das ander gegen mittag doryn
yndia leit.  Auß disem gepurg entspringen dy grosten wasser in yndia
als ga[n]ges vnd yndus mit dem flyß tigris das do entspringt auß dem
geburg niphates Eufrates aber das fliß yn armenia der grossenn
entspringt auß den pergen periardes.  diß sei dy furderlichsten flis
vnd berg yn azia.


Azia minor klein asia. 1

[D]Js teil der welt ligt vom occident 55 grad das ist yn dem 11
meridian vnd strecket sich yn orient bis yn den 71 grad das ist yn den
14 meridian vnd wirt vmgeben mit mör von miternacht das do genant
ist pontus euximus.  das ist das swarcz mör.  Uom occident mit dem
egeischen mör vom mitag mit dem krichischen mör. von orient mit
dem schonen fliß evfrates.  dise klein asia hat 12 kunnigreich als das
reich Bittimie Paflagonie pallacie. capadocie.  meonie. lidie
pamphilie licie cilicie // klein armenien frigie vnd carie. vber alle
reich ist der turk ein hermy pye diser cleinen azia in Carpatischen
mor ligt dy ynsul Rhodis dy do halten dye Johanniter Ritter.  Diß ynsul
ist ein fart belegerdt worden von dem Turken zu gewynen.  Ym yor alls
man schreibt 1480 Und nichtz dauon bracht dan laster vnd schand Diß
ynsul ligt von ocident gleich yn dem 58 grad nohe dem 12 meridian vom
abend gerechnt in orient.  Dis volk yn disem land azia minori sind
Turken Crichen Jacobiten Armenien vnd ander vil nacion von dem glouben
machometi.  Ein grad nach der leng auf disem land macht 47 meiln.  Dy
grost leng diß tags yn disem teil ist 15 stund yn dieser azia minori
leyt dy stat Troya von den kr[i]chen zu stört.  vil ander groß stet
hat dis lant dy ptolomeuß yn seinen Figuren devtet


Sarmatia Aziatica Mosquiten 2

[V]on orient wirt diß teyl beslossen mit dem großen flis rha. das do
entspringt auß den pergen hiperborei vnd felt yn des hyrcanisch
mer.  von occident greniczt dis teyl mit litaven vnd revssen.  vom
mittag mit dem berg caucaso vnd mit dem hircaaische mor vnd hat an der
breit 4 meridian vnd 2 grad von occident ligt es 64 grad vnd get bys
yn den 87 grad.  gegen miternacht preitet sich es bis yn das unbekant
teil der werlt diß land helt der mosquit der do vil wusts lands hat
wenig von steten vnd dorff // sunder ein wolbeslossen land hat er mit
gepirg vnt mit wasser.  in diser mosquitey hat alexander magnus
gesaczt. ein altar seul zu seinem gedechtnuß das er also weit het
gestriten yn der werlt Dise seul stat under dem 80 grad von occident
vnd yn dem 16 paralel.  Dise Mosquitn sind torstig zu streit als vnd
ouch alle dy do ligen yn disem teil Sarmacia lengsten tag haben si 17
stund


Armenia maior groß armenien 3

[E]S ist zu wissen das Armenia wirt beslossen von orient mit dem
hircanischen mör vom occident mit dem swarczen mör von
mitternacht mit den mosquiten greniczt habend vom mittag hat es
grenicz mit dem land azirie.  yn ym flewst das flis evfrates teylend
von ym klein armenien vnd klein aziam ouch hat diß lant yn ym
streichend das fliß Tigris das do vrsprung hat aus den pergen niphates
als vorhyn gesagt ist vnd leit vom occident 72 grad mit seinem anheben
das ist yn dem 14 meridian vnd 2 grad vnd strekt sich bis yn den 81
grad das ist yn den 16 meridian vom obend gecelt.  dis teil asie hat in
ym dy ynwoner. colchos yberos.  albamos. das ist dy groß Thatarey.  vnd
hat dy mechtig stat tarpeson als talina dise Tafeln diß lants helt der
turkisch keiser.  vnd si haben ym lant lengsten tag 15 stund ouch
wurcht man in ormenia maiori vnd in media vil seiden gwand tebich vnd
ander mancherley gwand //


Siria mesopotanea babilonia. 4

[I]N dem 4 teyl azie vint man dise lantschafft alls siriam
Mesopoteneam. Babiloniam.  dass lant palestina das Judisch lant
Petrea. vnd die wuste arabia.  dise alle regiones werden beslossen bey
eynander zwischen orient vnd occident anzuheben an dem 64 grad.  das
ist der 13 meridian vom abend bis yn den 80 grad das ist der 16
meridian.  dise lant werdn beslossen von mittnacht myt klein armenien
greniczent.  von occident haben dise land ein anstossend mör genant
siriacum mare das ist das mör sirie sicht. gemeilich ist es genant das
mitell mör.  vom mitag greniczen dise land mit arabia felici das ist
mit dem seligen oder lobsamen land arabie dorin vil kunst der ercznei
funden ist von orient wirt es beslossen mit dem wasser Tigris bei
disen landen ligt ouch das glopt lend Judea paliestina genant in
welchm iudea 12 geslecht israel sunderlich land gehapt haben.  in
diser iudea ist das flis iordanus der do entspringt uß zwaien born Der
ain ist genant Jor. der ander dan.  in diser iudea leit ierusalem di
namhafftige stat dise land haben gemeinlich tage vff das lengst 14
stund dise tauel oder gesamelt land helt in der husahesa b[i]s vff
iudeam palestinam das do helt der soldan.  auch helt dise palestina
iudaica das tote mör das do ist vnteilhafftig cleberig pei enander als
ein gemachter leim // diß meres materia kan man mit nicht geteilee
allein mit einem faden der do gezogen ist durch rot der frowen das ist
menstrum.  Dise ding schreibt anßhelmus de imagine mundi ouch sagt ein
ander Lerer wi daß man pei disem toten mör vint den gifftigen slangk
Thirus genant dauon man Thiriaca macht diser slang ist blind bei disen
landen ligt di kungklih insul ciprus genant gleich vnder dem 13
meridian das ist vnder dem 65 grad von occident vnd ligt in dem 10
paralell dise insul hat am ersten gebavt iaphet noe son nach der
sintflucht in diser insull wirtt nach gezeigt veneris garten dorin
iuno pallas vnd venus ein gezenk heten der schönheit halb auß diser
insul ciprus ist gezukt worden helena von paris darumb dan der
troianisch krieg langzeit wertt mit dem andern nahmen heist diese
cetim in der schrifft oder paphon von einer stat die in cipro also
heist die hevptstad in dieser insull ist Nicosia.  in diser ynsul
haben si gut starck wein.  Jtem auff den höchsten pergen yn cipro ist
ein kirch dorin stat das krücz des schachers zu der rechten hant Hiesu
gehangen hat.


Media persidis hircania parthia. 5

[D]ise land alle mit enander werden zusamen genomen vnnd gerechend fur
ein gegenheit vnd ligen mit irem anhebenn grenicz habend mit
Mesopotanea vnd Babilonia in dem achtzigisten grad von occident // das
ist an dem 16 meridian vnd strekt sich bis yn den 101 grad das ist der
18 meridian von occident.  dise lant werden von miternacht beslossen
mit dem hyrkanischen mör von occident greniczun sy mit Mesopotanea von
mitag mit dem hap des persien mers von orient mit dem perg maßdoranus
dise land helt der hussaheß vnd ist fruchtpar yn guten weinen yn vil
tyren zuouorauß kameltir dy do alt werden 60 Jor


Arabia Felix fruchtpar arabia 6

[D]Js loblich vnd selig land arabia ein muter aller arczney zu
enthalten.  pey dem wesse tötliche corper.  wirt geteilt yn zwey teyll
alls yn arabiam felicem vnd in carmania.  auß dyserr arabia komen dise
all specerey dy ma haben muß yn den appoteken.  Und von dan ist komen
all kunst der arczney.  wan worum es ist gewest ein kunig yn arabia
der do gehalten hat 12 philozophos oder meister dy do haben vor ym
mussen Disputiren von natur der kreüter vnd diselben beweren vnd so
yndert eyner funden ist wordn der do nicht het konden erkenen dy natur
des krauts dorumb er gefragt wer worden der must furt mer ewiklich
swygen von aller arczney.  Do sei auffkomen der krüter natur worzu si
nuczlich sind.  Dise arabia felix leyt von occident mit yrem anheben
68 grad das ist in dem 14 meridian vnd get bis yn den 104 grad vnt
wirt beslossen von orient mit dem indische mör // von occident mit dem
roten mör von mitnacht mit dem hap des mörs persici von mittag mit dem
indischn vnd roten mor.

Diß lant ist gewest ein vaterland des königs Caspar der do bracht
oppfer Jhesu von arabischen gold auss der stat sabba in arabia von
occident 74 grad 1/2 das ist vnttir dem 14 meridian vnd yn dem ersten
clima am end das ist 16 grad. von Equinoxial In dem mer arabiee do
ligt ein Insul genannt insula magorum.  Do sagt man das do sollen
außkomen sein Malchior pringed weiroch vnd mirre welche gummi wachsen
yn der selbe insul vnd ouch yn arabia Der drite könig sol komen sein
als dy schrifft sagt von orient ethiopie das ist ethiopia vnder
egipten.  Diß land hat leng[s]ten tag 13 stund ouch ist diß land
vberflussig in edln gesteinen vnd perlen dorin ist der perg sinai do
sant Katherina auff leit den ptolome[u]s nent sinoden


Scitia intra ymaum montem.  Scitia zwischen dem berg Ymaus

[Di]Se scitia wirt genant von den menschen Sciti di do grausam sint
allen menschen wann alls ptholomeus schreipt so essenn si menschen
fleisch vnd blut.  dise gewonheit haltenn si bei in auff den hevtigen
tag vnd sind vnstet yn irem wesen wan worumb si ligen nimmer an einerr
stat Sunder wan di sonne sich nehet gegenn dem Tropico Cancriso
ziehenn si gegenn mitternacht vnd so di sonn wider get ad Tropicum
capricorni // so zyehen si aller der sonen nach vnd wonen yn den
welden als dy vnuernyfftigen tyr futern vnd. das weyl si an der selben
stat futr haben vnd darnach ziehen si aber weyther.  diß land wirt
beschlossen von occidentt mit dem flyß raha vnd grenicz mit sarmacia
aziatica. von mitternacht mit vnbekanten landen.   vom mitag gremczit
es mit yndia zwischen dem fliß gangem vnd mit dem lande parthie vnd
arie. von orient mit dem perge ymaus.  vnd mit seynen anhebendenn
greniczen ligt es von occident ym 85 grad.  das ist in dem 16 meridian
vnd get bis yn de 28 meridian das ist 140 grad vnd hat lengsten tag 16
stund.  yne diser gegenheit sei mancherley Nacion. als mangiany
Bactriani.  dy haben kamelthur dy nymer yre fuss ap gehn oder
treten.  dornoch sein sogdiani vnd comari.  dis lant hat bevm alls groß
das vnder eins bavmes schaten ligen mögen 300 mensche. vnd ein
blatt ist 4 schuch lang auff dy pletir haben vorzey[t]en geten
geschriben di alltn pphi.  E das si papir hettenn ouch fint man yn
sacharum der gegenheyt vnt yn bactriana weinbeym alß gros das eyn
traub des weinstoks gibt drei fuder wein.  di grösten perg hatt si
ymam vnd thaurum der hy yn dysem land wirt genant coronus.  das grost
fliß yn Scitia ist genant Yasartus vnd laufft yn seinen strich vber
300 meyl vnd kompt auß dem berg Ymaus vnd felt yn das hyrcanisch
mör ein grad nach der leng ober diß lant hat 40 grad //


Scitia axtra ymaum montem 8

[W]Jrt genant auff teutsch scitia auß dem pergk ymaus ein land ser
wust von volk vnd von stetten weyt feld habend vnd fruchtpar yr
grenicz helt si mit dem erstgedachten scitia anheben von occident 145
grad das ist yn dem 27 meridian vnd get bis an das end der bekanten
werlt das ist biß yn 180 grad des letsten meridians.  dis lant wirt mit
keinem mör vmgeben sunder gegen mitnacht vnd gegen dem vßgang do
begreifft si dy end vnser bekanten werlt.  vom occident greniczt si
mitt der ynnern scitia vom mittag mit yndia dy gröstn fliß yn dysem
land seyn dyse zwen bantisis vnd der chadus.  dy gröste perg sind
montes casy vnd monserici.  yn diser gegenheyt habn dy menschen ein
selczame gewonheit. als wen yndert ein mensch krank wirt so sind do
seyn freund vnd töten vnd essent in sprechen es ist besser das er
von vns gessen werd dan von den worme der erden.  vnd welcher der
nehest frund ist d[er] nympt den hyrnschedl vnt late ym yn gold fassen
vnd braucht yn dorauß zu trinken zum gedechtnuß seyns freunds.  yn
disem land sint vil greiffe dy do mit mensche streit haben diß lant
lengstn tag 16 stund im mitel des lands.  am end aber gegen mitnacht
haben si tag 20 stund. //


Aria paropanisis drangiana arachosia 9

[D]yse yczgemelte land liged vom occident ym 100 grad mit yren
anheben.  das ist yn. dem 20 meridian vnd streckt sich yn 120
grad. macht den 24 meridian Dis land gegen mittnacht gremczt mit dem
land Bactriana doryn der groß kam siczt.  vom occident mit carmania
vom mittag mit dem yndischen mer.  von orient mit Yndia In disem land
sind zigen mit grossen oren Suptil har tragen. von welchn zigenharn
man den lotzam macht.  ouch sunst hat das land vil von seidem gewant
vnd von edlem gestein vnd perln.  yn disem lande ist das gebirg Becius
vnd paropanuis ser hoch allso das man meynt es rür dy wolkn.  der
lengst tagk yn disen landn ist 14 stund 1/2


Yndia zwischen dem flis ganges.

[I]Ndia wirt genant von dem flis yndo das do felt yn das yndisch mer
mit 7 flissen. vnd leyt czwischen yndo vnd gange den zweyenn flissenn.
vom obend leit es yn grenicz mit arachosia vnd gerodosia in dem 105
grad das ist ym 23 meridia vnd geht in di leng von occident yn orient
bis yn den 148 grad.  das ist yn den 30 meridia von miternacht wirt es
beslossen mit dem gebirg ymaus von mittag mit dem yndischen mor von
orient mit dem flis gange. von occident mit dem flis yndo.  von dyser
yndia schreiben // Doctores Poeten Philozophi vnd ander vil mayster
wunderliche vnd vngeleuplich ding.  Sagt strabo wy daß yn dem yndische
mör walfisch sein an der lang habend 4 ackerland das macht ein hub yn
disem mör wechst ror alls hoch vnd groß das man dauon heuser baven mag
vnd von einem glid eins rores machen dy yndi ein schifflein doryn drei
man siczen mögen.  Ouch fint man yn diesm mer schneken das man auß eim
schneknhauß magk machen ein gemach fur czway mensch.  vnd vil auß den
yndianen wonen vnder disen schneken.  vnd sind swarcz an yrm leib vnd
wenig essen si von fleysch speis Sunder sunst haben si vil edel frucht
der erden vnd der bevm dy do vß der maß naturlichs schmack sint.  Ouch
sagt der vorgenant Lerer wy das ein rechter yndyan außwendig seinem
land nicht lang leben mag. das ist von wegen der subtyll vnd
nuczlichen frucht dy si brauchen yn yrem land.  Und so sie diser
frucht nicht haben. werdn si an irer natur gesweht ouch ist das land
ser fruchtbar von menschen wan worumb so eyn freulin 5 yor alt ist si
gebirt si kinder yn disem land ist der briester Johan alls yn
ewropa. der Bapst. vnd ist gesalbt von Sancto Thoma.  vnd all sein
volk ist kristen vnd hat vnder ym 500 000 gemaurther stet. vnd hat
vnder ym 24 kungkreich vnd so yndert ein land ein kung erwelt hat So
mus er gekront werden vom priester Johan // vnd diser Briester Johan
seczt auff dy kron den kung mit seinen fussen. zu bedeuten das si ym
vndertenig sollen wesen dy weil si leben plinius vnd solinus dise
baide maister sagen wye das vnder den pergen thauri der pfeffer wechst
yn mossen wye.  Jachandilber zwischen welchen stauden man vint langen
pfeffer.  vnder disen stauden sein vil der schlangen dy do fligell
haben vnd dy menschen ser leidigen von deßwegen dy yndi mussen fewr
vndt rauch machen dorvor dyse wormer fliehen also Clauben si den
pfeffer.  Sagt Anßhelmus de ymagine mundi. das in yndia sind groß
Elephanten czu dem streyt wol tugend ouch hatt das landt eyn bestia
moceron genat Sittich vögl vnd ander selczame tyr vil schöner edler
steyn tregt diß land mit vberflussikeyt des golds man vint
Carfunckel. dyamantt berilln vnd grosse berlen Jtem man vint omessen
als dy schoff groß vnd werden gespeyst mit gulden.  Jtem öln 300
schuch lang.  Jtem hohe bevm dy kein armbrust mit schussen mag
erlangen.  Jtem der kung botras yn yndia der vormagk alczeyt. 30 000
wolgewapenter Elephanten zu strit.  Sunst eyn yczlicher kung dorynn
vermag yr 8 000 Es ist ein volk dy do genant sein brachmani vnd haben
ir rent vnd zinß. das si nichcz anders tun wan das si got piten vmb
kelt wan worumb di groß hicz der sonne zwingtt si zumol ser wan si
ligen noch dem weg der sonnen //

Jtem alle schiffleuthe yn yndia sechend nicht meh wann eynen
stern. genant Canapos dornach sy sich richten.  vnd habend grosse
uinsternis des mones vnd der sonnen so si eclipsiret werden das ist
besthetiget.  disse yndia ym mittil hat si tag awffs lengste 13 stunden
vnd 1/2


Jndia extra gangem awssen dem flis gange 11

[D]Jsse andre yndia grantzet kegen occident mit der
vorgedachten.  gegen mitternacht hat sy das gepirg ymaus alias. emody
pergk. sericy pergk. semantini perge vnd vntter dissen pergen allen
wechßt pheffer yn mass als vorgesagt ist. von orientt endet disses
land vnnßer bekanten werld.  vom mittage wirt dyß land vmbgeben mit
dem yndischen mehre yn welchm mer vil ynsuln sein selzcam volk habend
nach der natur vntter welchen ynsulen sind etliche gnandt. maiorica
vnd ynsula guttis glucks awff latin bone fortune pey dyssenn ynsulnn
tar kein schiff nohe hynpey gehn das do eyßere negel hatt.  wenn worumb
das selbe mer hat yn yme gantze felße des steines herculei der an sich
zcewcht das yssen dorumbe sint yre schiff eissen darbende dis land
anhebend vom ocident 140 grad gehet hyn bys zw dem ende der werld das
ist biß yn den 180 grad das ist der letzte meridian.  das anheben dis
landes von occident ligt in dem 29 meridian.  das grosse flis yn yndia
extra // gangem ist gnant damas entspringend aüß denn pergen emody
vnd sericy yn disem land ligt dy stat kathigara am ende der werld.  yn
disser kathigara vnd vmbligenden land dy habend volk yn.  yndy do
schwentze habend gelich als dy yn lisbon ader engilland disse czwen
stete ligent von enander 25 306 meilen welsch.  der lengste tag yn
disser yndia ist 13 stunden vnd 1/2


Taprobana ynsula ym yndischen mehre

[D]J edle taprobana avff allen seyten vmbflossen mit mehr treitt vil
edler steine. schon gold grosse their. alte menschen Als strabo
schreibt das die mensche yn Taprobana ynsula lebent alz lang das si
bytten yre kinder das si getotet sulden werden aber awß der ynsul
gefüret werden awff das si mochtend sterben.  disse menschen sein
sere groß alz dy rissen vorczeiten gewest sein.  yn diser ynsel fellt
kein plat von keinem bowme yn keinerley weiße Avß disser ynsul kompt
vil specerey Als pheffer ynbir mußkatum Thadiln vnd das holtz ebanus
das yn dem fewer nicht vorprent sunder nur gluet vnd herter
wirt.  dysse specerey vnd ander kowffmanschatz pringen sy awff das
yndische mehre zw dem flis gange vnd widervmb komenn dy indischen
kowfflewthe ouch awff dissem wassern entkegen setzende ire guttur
gegen dissenn awß taprobana vnd reden nicht mitenander.  sunder // der
do ware hat yn synem schiffe. zw stotzen adder weschßiln vmb andere
war.  der steket awff ein fenleyn vnd gibt yn bedewtenn daß er daz
seine stotzen will an ein ander schiff dornach nimpt einer awß zween
kawffleuten das ander fenlin vnnd legt ys vff seine war.  So der ander
sein zceichen sucht vnd v[i]ndet awff einer ware dy ym gef[e]lt so
nimt er sein zceichen vnd legt yß wider awff sein war.  zw bedewten das
ys yn beden gefelt dornach niht der kawffman awß yndia das schiff awß
Taprobana vnd der ander widervmb also kawffschlagen sy mit enander
nicht redendt wen worrumb disse awß taprobann dy habend kein
gemeinschafft yn sproch mit yndirt ein ander nacion vnter der
sonnen.  Mit dissen vnd ander dingen sein genug gesagt von ynhalt
disser vnßer bekanten werld was volk waß sitten sy haben vntter
welchenn teil der werld si gelegen sein vnd mit was mer vndt gepirg sy
vmgeben sein vnd waß flisse awß den selben entspringgen.  das man dann
yn der offtgedachten figur wol vinde magk yn einer geme[i]nn so man
recht merket awff dy grad vom orient yn occident awff dy
meridian. awff dy paralelln vnd andere nottorfftige dingk dorzv
dienend so si[n]d dy grad gesaczet vntten an der figur vnßer bekanten
werld von occident gezcallt 180 dorauß dan alle figuren der lande
offenbar werden so man zceucht ynn dem meridian avff gegen mitternacht
dar ynne dan // ein stat eyn land bezceichnet wirt.  dysse alle
obgeschriben ding werden dem leßer wol beka[n]t werden So er
avffmerken hat awff ynhalt der figuren in dyssem buchlin

[D]Js gantze dritte teyl der werld azia genanth hat yn prawchunge.  dy
Calidischen. arabischen vnd yndischen litern vnd ein teil auch
hebreischen.  Jtem der husse heze pravcht yn allen sinen landen der
caldeyschen littern adder puchstaben yn mangerlei wiße mit schriben
vnd avß sprechen Jtem der Soldan hat ym vbunge am meisten teil di
arabischen littern vormischt mit caldeischen vnd hebreischen Jtem der
prist iohan hath yn sinem lande vbunge der yndischen littern yn
schreiben vnd außsprechen Sunst in der gemein ist turcksch. armenisch.
indisch vnd schitthiß sprach yn gewonheit der menschen in azia vil
selczamer sitten der menschen vnd gewonheithen sind in der werld an
sprach tracht vnd geschicklichkeit der menschen dy yn zcvgeeigenth
sein von natur mit grossenn vnttirscheid van enander geteilet nach
gestalt der corper yres leichnams.  Als do sein Satiri dy do haben ein
horn an der stirnen.  pignei sein an irer statur eins elpogenn hoch
cenocephali haben hundis hewpter Blemny yn libia haben dy ougen // An
der prust vnd kein hewbt.  pigmei einen fus habe[n]d streiten mit den
cranchen Masagitte so einer crank wirt so fressen si in. avff das er
von den wurmen der erden nicht fressen werd.  padei haben 4 weibir so
der man stirbt mus sich der lipste mit im vorprennen Arabes halten
kein schwein.  Schitti asperi di essen menschen fleisch.  vnd so si
einen erschlagen haben trincken si das plut auß seinen wunden.
yndiani haben schöne [w]eiber vnd gro[ß]e kinder.  Disse alle nacion
vnd anderr nacion Cristen vnd heiden turken vnd iuden rewßen vnd
criehen.  Di alten vnd iungen sein phlichtig zw loben den scheppir
aller dinge dem do ere vnd dangksagung sei in ewigkeith.